جنوں تہمت کشِ تسکیں نہ ہو گر ۱ شادمانی کی
نمک پاشِ خراشِ دل ہے لذّت زندگانی کی
کشاکش ہائے ہستی سے کرے کیا سعیٔ آزادی
ہوئی زنجیر موجِ آب ۲ کو فرصت روانی کی
پس از مُردن ۳ بھی دیوانہ زیارت گاہِ طفلاں ہے
شرارِ سنگ نے تربت پہ میری گل فشانی کی
نہ کھینچ اے دستِ سعیٔ نا رسا زلفِ تمنّا کو
پریشاں تر ہے موئے خامہ سے تدبیر مانیؔ کی
کماں ہم بھی رگ و پے رکھتے ہیں، انصاف بہتر ہے
نہ کھینچے طاقتِ خمیازہ تہمت ناتوانی کی
۴ تکلف بر طرف، فرہاد اور اتنی سبک دستی
خیال آساں تھا، لیکن خوابِ خسرو نے گرانی کی
اسدؔ کو بوریے میں دھر کے پھونکا موجِ ہستی نے
فقیری میں بھی باقی ہے شرارت نوجوانی کی