ضمانِ جادہ رویاندن ہے خطِ جامِ مے نوشاں
وگرنہ منزلِ حیرت سے کیا وقف ہیں مدہوشاں؟

نہیں ہے ضبط، جز مشاطگی ہائے غم آرائی
کہ میلِ سرمہ چشمِ داغ میں ہے، آہِ خاموشاں

بہ ہنگامِ تصور ساغرِ زانو سے پیتا ہوں
مئے کیفیتِ خمیازہ ہائے صبح آغوشاں

نشانِ روشنیٔ دل نہاں ہے تیرہ بختوں کا
نہیں محسوس، دودِ مشعلِ بزمِ سیہ پوشاں

پریشانی، اسدؔ، در پردہ ہے سامانِ جمیعت
کہ آبادیٔ صحرا، ہجومِ خانہ بر دوشاں