ہوا جب حسن کم، خط بر عذارِ سادہ آتا ہے
کہ بعد از صافِ مے، ساغر میں دُردِ بادہ آتا ہے

نہیں ہے مزرعِ الفت میں حاصل غیرِ پامالی
نظر دانہ، سرشکِ بر زمیں افتادہ، آتا ہے

محیطِ دہر میں بالیدن، از ہستی گزشتن ہے
کہ یاں ہر یک حباب آسا، شکست آمادہ آتا ہے

دیارِ عشق میں جاتا ہے جو سوداگری ساماں
متاعِ زندگانی ہا بغاوت دادہ آتا ہے

اسدؔ، وارستگاں با وصفِ ساماں بے تعلق ہیں
صنوبر گلستاں میں با دلِ آزادہ آتا ہے